తెలంగాణలో నేటి నుంచి హైదరాబాద్ బుక్ ఫెయిర్(హెచ్‌బీఎఫ్‌) ప్రారంభం కానుంది. హైదరాబాద్‌లో ఎన్‌టీఆర్‌ స్టేడియంలో గురువారం(19) అనగా నేటి నుంచి 29వ తేదీ వరకు ఈ బుక్ ఫెయిర్‌ను నిర్వహించనున్నారు. ఈ 37వ హైదరాబాద్ బుక్ ఫెయిర్(హెచ్‌బీఎఫ్‌)ను సీఎం రేవంత్‌రెడ్డి ప్రారంభించనున్నట్లు హెచ్‌బీఎఫ్‌ అధ్యక్షుడు డా.యాకూబ్‌ షేక్‌ తెలిపారు.ఈ సందర్భంగా ఆయన మాట్లాడుతూ.. బుక్ ఫెయిర్‌లో సుమారుగా 350 స్టాళ్లను ఏర్పాటు చేస్తున్నట్లు వెల్లడించారు. దేశవ్యాప్తంగా ఉన్న 210 మందికిపైగా ప్రచురణకర్తలు, డిస్ట్రిబ్యూటర్లు పుస్తకాలను ఈ బుక్ ఫెయిర్‌లో ప్రదర్శించనున్నారు. సుప్రీంకోర్టు విశ్రాంత న్యాయమూర్తి జస్టిస్‌ బి.సుదర్శన్‌రెడ్డి, ఎమ్మెల్సీ ప్రొఫెసర్‌ కోదండరాం, సీనియర్‌ పాత్రికేయులు కె.రామచంద్రమూర్తి, ఆచార్యులు రమా మేల్కోటేలతో సలహాతోనే కమిటీ ఏర్పాటు చేసినట్లు అధ్యక్షుడు తెలిపారు.
బుక్ ఫెయిర్ ప్రాంగణానికి మహాకవి దాశరథి కృష్ణమాచార్యులు, సభా కార్యక్రమాల వేదికకు రచయిత్రి, ప్రసిద్ధ విమర్శకురాలు బోయి విజయభారతి, పుస్తకాల ఆవిష్కరణ వేదికకు తోపుడుబండి సాదిక్‌గా నామకరణం చేశామన్నారు. తెలంగాణ రుచులతో ఫుడ్‌ స్టాళ్లు ఉండటంతో పాటు పిల్లల కోసం ప్రత్యేక కార్యక్రమాలు, సాంస్కృతిక ప్రదర్శనలు, వైద్య శిబిరాలు కూడా నిర్వహిస్తామని తెలిపారు.
