06/08/2024

ప్రైవేట్‌ హాస్టళ్లలో భద్రత కరువవుతున్నది. అసాంఘిక కార్యకలాపాలకు అడ్డాగా మారుతున్నది. పంజాగుట్ట పోలీసుస్టేషన్‌ పరిధిలో పలు హాస్టళ్లను పోలీసులు తనిఖీలు చేపట్టగా, డొల్లతనం బయటపడింది. అనేక హాస్టళ్లలో పని చేయని సీసీ కెమెరాలు, సెక్యూరిటీ గార్డు వ్యవస్థ, హాస్టళ్లలో చేరే వారి పేర్లు సరిగా లేకపోవడం, దానికి సంబంధించిన రిజిస్టర్లను నిర్వహించకపోవడాన్ని పోలీసులు గుర్తించారు.

పంజాగుట్ట ఏసీపీ మోహన్‌ కుమార్‌, సీఐ శోభన్‌ నేతృత్వంలో 25 మంది సిబ్బంది ఈ తనిఖీలు చేపట్టారు. ఇప్పటికే వివిధ హాస్టళ్లు నిబంధనలకు విరుద్ధంగా నిర్వహిస్తుండడంతో పాటు మరికొన్నింటిలో అసాంఘిక కార్యకలాపాలు జరుగుతున్నాయన్న ఆరోపణలు వచ్చాయి. అలాగే పలు డ్రగ్స్‌ విక్రయ ముఠాలకు అడ్డాగా మారిందన్న ఆరోపణలు సైతం వినిపించాయి. దీంతో పోలీసులు ప్రైవేట్‌ హాస్టళ్లపై ప్రత్యేక దృష్టి పెట్టారు.

పని చేయని సీసీ కెమెరాలు

పంజాగుట్ట పోలీసు స్టేషన్‌ పరిధిలో గతంలో అనేక చోరీ ఘటనలు చోటు చేసుకున్నాయి. తాజాగా ఓ సెల్‌ఫోన్‌ సైతం అపహరణకు గురికాగా, సీసీ కెమెరాలు పనిచేయకపోవడంతో దొంగలను పట్టుకునేందుకు నానా తంటాలు పడ్డారు. నెల రోజుల కిందట పోలీస్‌ అధికారులు..సుమారు 250 మంది హాస్టళ్ల యాజమాన్యాలను పిలిపించి.. నిబంధనలను పాటించాలంటూ.. స్పష్టమైన ఆదేశాలు జారీ చేశారు. అయినా..ఏ ఒక్క హాస్టల్‌ యజమాని కూడా నిబంధనలను పాటించడం లేదన్న విషయం తాజా తనిఖీల్లో వెలుగు చూశాయి. సోమవారం అమీర్‌పేటలోని హ్యాపీ హోమ్స్‌, కావూరి మెన్స్‌ హాస్టళ్లలో తనిఖీలు నిర్వహించగా, సీసీ కెమెరాల వ్యవస్థ లేదు. ఉన్న కెమెరాలు పనిచేయకపోవడంతో పాటు దానిని భద్రపరిచే డీవీఆర్‌ పనిచేయడం లేదు.

పంజాగుట్ట పోలీస్‌ స్టేషన్‌ పరిధిలో సుమారు 250కి పైగా ప్రైవేట్‌ హాస్టళ్లు ఉన్నాయి. గతంలోనే ఆయా హాస్టళ్లను పరిశీలించిన పోలీసులు వారికి నోటీసులు సైతం జారీ చేశారు. అయినా యాజమాన్యాలు పట్టించుకోలేదు. తాజాగా జరిగిన తనిఖీల్లో సెక్యూరిటీ గార్డులే కనిపించలేదు. ఒక్క హాస్టల్‌లో కూడా సరైన సెక్యూరిటీ వ్యవస్థ లేదు. రాత్రి వేళల్లో హాస్టళ్ల వద్ద లైట్లు సైతం వెలుగడం లేదు. దీంతో తరచూ దొంగతనాలు జరుగుతున్నట్లు పోలీసులకు ఫిర్యాదులు అందుతున్నాయి. హాస్టళ్లలో చేరే వారి సమాచారం కూడా యాజమాన్యాల వద్ద లేకపోవడాన్ని గుర్తించారు. కొందరి ఆధార్‌ కార్డులు సైతం అస్పష్టంగా ఉన్నాయి.

కూకట్పల్లి నియోజక వర్గం లోని వివిధ డివిజన్ లకు చెందిన దాదాపు50 కి పైన లబ్ధిదారుల కుటుంబాలకు45లక్షల విలువైన ముఖ్యమంత్రి సహాయ నిది చెక్కులను కూకట్పల్లి నియోజక వర్గ కాంగ్రెస్ పార్టీ కార్యాలయంలో నియోజక వర్గ కాంగ్రెస్ పార్టీ ఇన్చార్జి బండి రమేష్ కూకట్పల్లి నియోజక వర్గ కాంగ్రెస్ పార్టీ సీనియర్ నాయకులు గొట్టుముక్కల వెంకటేశ్వర రావు (GVR)ల చేతుల మీదుగా లబ్ధిదారులకు అందజేయడం జరిగింది.ఈ కార్యక్రమంలో వివిధ డివిజన్ల అధ్యక్షులు,కాంగ్రెస్ పార్టీ సీనియర్ నాయకులు మరియు కార్యకర్తలు పాల్గొన్నారు. ఈ సందర్భంగా లబ్ధిదారులు రాష్ట్ర ముఖ్యమంత్రి వర్యులు రేవంత్ రెడ్డికి, బండి రమేష్ జివిఆర్ లకు ప్రత్యేక కృతజ్ఞతలు తెలిపారు.

ఏపీలోని గుంటూరు జిల్లా తెనాలికి చెందిన పానీ పూరీ వ్యాపారి మేఘావత్‌ చిరంజీవికి అరుదైన గౌర‌వం ద‌క్కింది. న్యూఢిల్లీలో ఈ నెల 15న నిర్వహించనున్న స్వాతంత్య్ర వేడుకల్లో పాల్గొనాలని రాష్ట్రపతి ద్రౌపది ముర్ము నుంచి ఆయనకు ఆహ్వానం అందింది. ఆహ్వాన ప్రతిని పోస్ట్‌ ద్వారా అందుకున్నట్లు చిరంజీవి సోమవారం తెలిపారు. 

కాగా, చిరంజీవి త‌న వ్యాపార వృద్ధి కోసం జాతీయ పట్టణ జీవనోపాధి మిషన్‌ కింద రుణం తీసుకున్నారు. బకాయిలను సకాలంలో చెల్లించడం, డిజిటల్‌ లావాదేవీల‌ను ప్రోత్స‌హించినందుకుగాను ఆయ‌కు ఈ ఆహ్వానం అందినట్లు అధికారులు చెప్పారు. 

త‌న‌కు అందిన ఈ అరుదైన ఆహ్వానం ప‌ట్ల‌ ఆనందంగా ఉందని మేఘావత్ చిరంజీవి తెలిపారు. తనకు ఆహ్వానం పంపిన రాష్ట్రపతి ద్రౌపది ముర్ముకు ఆయ‌న‌ ప్రత్యేక ధన్యవాదాలు తెలియ‌జేశారు.

హైదరాబాద్‌లో ప్రతిష్టాత్మక విద్యాసంస్థలు ఉన్నందున ఇతర రాష్ట్రాలకు చెందిన విద్యార్థుల చాలా మంది ఇక్కడే విద్యాభ్యాసం చేస్తున్నారని వెల్లడించారు. కొత్త నిబంధనల ప్రకారం వారంతా తెలంగాణలో లోకల్ అవుతారన్నారు. అదే విధంగా ఇతర రాష్ట్రాలలో చదివే మన విద్యార్థులు నాన్ లోకల్ అయ్యే ప్రమాదం ఉందని చెప్పారు.

2023-24 విద్యాసంవత్సరం వరకు 6 నుంచి 12 తరగతి వరకు నాలుగేండ్లు గరిష్టంగా ఎక్కడ చదివితే అదే స్థానికతగా గుర్తించాం. దాని కారణంగా మన విద్యార్థులు ఇంటర్మీడియేట్ కోసం ఇతర ప్రాంతాలకు వెళ్లినప్పటికీ వారు లోకల్‌గానే పరిగణించబడే వారు. తాజాగా ప్రభుత్వం చెబుతున్న కొత్త నిబంధనల ప్రకారమైతే వేలాది మంది ఇతర రాష్ట్రాల విద్యార్థులు తెలంగాణలో లోకల్ అవుతారు. దీంతో మన విద్యార్థులు మెడిసిన్ సీట్లు కోల్పోయే ప్రమాదం ఉందని ఆందోళన వ్యక్తంచేశారు. ప్రభుత్వం వెంటనే ఈ నిర్ణయాన్ని వెనక్కి తీసుకోవాలన్నారు. తెలంగాణ విద్యార్థులకు అన్యాయం జరగకుండా.. గతంలో అనుసరించిన విధానాన్నే అనుసరించాలని డిమాండ్‌ చేశారు. ఈ సందర్భంగా “మెడికల్‌ సీట్లలో లోకల్‌కు కోత..” పేరుతో నమస్తే తెలంగాణ పేపర్‌లో వచ్చిన వార్త క్లిపింగ్స్‌ను కేటీఆర్‌ షేర్‌చేశారు.

కృష్ణా నది పరీవాహక ప్రాంతాల్లో కురుస్తున్న భారీ వర్షాలతో శ్రీశైలం ప్రాజెక్టుకు భారీగా వరద నీరు వస్తోంది. ఎగువన ఉన్న జూరాల, సుంకేసుల డ్యామ్ ల నుంచి శ్రీశైలం ప్రాజెక్టుకు 3.93 లక్షల క్యూసెక్కుల నీరు వస్తోంది. దాంతో ఈ ఉదయం శ్రీశైలం డ్యామ్ వద్ద 10 గేట్లను 12 అడుగుల మేర ఎత్తి నీటిని దిగువకు విడుదల చేశారు. 

స్పిల్ వే ద్వారా 3.10 లక్షల క్యూసెక్కుల నీటిని విడుదల చేశారు. శ్రీశైలం జలాశయం గరిష్ఠ నీటిమట్టం 885 అడుగులు కాగా… ప్రస్తుత నీటిమట్టం 883 అడుగులుగా నమోదైంది. శ్రీశైలం జలాశయంలో గరిష్ఠ నీటి నిల్వ సామర్థ్యం 215.80 టీఎంసీలు కాగా… ప్రస్తుతం 204.35 టీఎంసీల నీరు నిల్వ ఉంది. 

కాగా, ప్రాజెక్టుకు భారీగా వరద నీరు వచ్చి చేరుతున్న నేపథ్యంలో జలవిద్యుత్ ఉత్పాదన ముమ్మరం చేశారు. కుడి, ఎడమ గట్టు జలవిద్యుత్ కేంద్రాల్లో విద్యుత్ ఉత్పత్తి చేస్తున్నారు. విద్యుత్ ఉత్పత్తి చేసి, దిగువన ఉన్న నాగార్జునసాగర్ కు 64,338 క్యూసెక్కుల నీటిని విడుదల చేస్తున్నారు.

రిజర్వేషన్ల కోటా కోసం ఆందోళనలతో దేశం అల్లకల్లోలంగా మారడంతో బంగ్లాదేశ్ ప్రధానమంత్రి పదవికి షేక్ హసీనా సోమవారం రాజీనామా చేసిన విషయం తెలిసిందే. భద్రత కోసం పక్కనే ఉన్న భారత్‌కు ఆమె నిన్ననే (సోమవారం) వచ్చారు. అయితే ఆమె ఇక్కడ తాత్కాలిక నివాసం పొందేందుకు భారత ప్రభుత్వం అనుమతి ఇచ్చినట్టు అంతర్జాతీయ మీడియాలో కథనాలు వెలువడుతున్నాయి. భారత్‌లో ఆమె నివాసానికి తాత్కాలిక ఆమోదం మాత్రమే లభించిందని, యూకేలో ఆశ్రయం అంశం ప్రస్తుతం పెండింగ్‌లో ఉందని పేర్కొంది.

హసీనా యూకేలో ఆశ్రయం పొందాలనుకుంటున్నారని, అక్కడి ప్రభుత్వం నుంచి అనుమతి దక్కే వరకు ఆమె భారత్‌లోనే ఉంటారని ‘డైలీ సన్’ కథనం పేర్కొంది. షేక్ హసీనా రాజకీయ ఆశ్రయం విజ్ఞప్తికి సంబంధించి ప్రస్తుతానికి యూకే ప్రభుత్వం నుంచి ఎలాంటి నిర్ధారణ లేదని పేర్కొంది. హసీనాతో పాటు ఆమె సోదరి రెహానా కూడా యూకేలో ఆశ్రయం కోసం ఎదురుచూస్తున్నారని ‘డైలీ సన్’ కథనం పేర్కొంది. కాగా హసీనాకు భారత్ పూర్తి ప్రయాణ సహకారం అందించనుందని వివరించింది.

షేక్ హసీనాతో పాటు ఆమె సోదరి రెహానా కూడా యూకేలో ఆశ్రయం కోసం ఎదురుచూస్తున్నారు. కాగా రెహానా కూతురు తులిప్ సిద్ధిక్ బ్రిటీష్ పార్లమెంటు ఎంపీగా ఉన్నారు. యూకేలో లేబర్ పార్టీకి ఆమె ప్రాతినిధ్యం వహిస్తున్నారు. ఇదివుంచితే బంగ్లాదేశ్‌లో వేగంగా మారిపోతున్న పరిణామాలను ప్రభుత్వం నిశితంగా గమనిస్తోంది. బంగ్లాదేశ్‌లో పరిస్థితులపై ప్రధాని నరేంద్ర మోదీ అధ్యక్షన కేబినెట్ సబ్ కమిటీ సోమవారం రాత్రి భేటీ అయ్యింది.

కాళేశ్వరం ప్రాజెక్టులో భాగమైన మేడిగడ్డ బరాజ్‌ కుంగిన ఘటనపై భూపాలపల్లికి చెందిన నాగవెల్లి రాజలింగమూర్తి జిల్లా కోర్టులో పిటిషన్‌ దాఖలు చేశారు. ప్రాజెక్టులో అవినీతి అక్రమాలు జరిగాయని, ఈ ప్రాజెక్టు అంచనా వ్యయాన్ని పెంచి ప్రజాధనం దుర్వినియోగం చేశారని, నాణ్యతాప్రమాణాలు పాటించలేదని పిటిషనర్‌ ఆరోపించారు. బొగ్గు పొరలున్న విషయాన్ని గుర్తించకుండా ఆ స్థలంలో ప్రాజెక్టు నిర్మించడంతో 7వ బ్లాక్‌లో ఒక పిల్లర్‌ కుంగిందని ఈ ఘటనపై విచారణ జరపాలని భూపాలపల్లి ప్రిన్సిపల్‌ జ్యుడీషియల్‌ ఫస్ట్‌ క్లాస్‌ మేజిస్ట్రేట్‌ కోర్టుకు విజ్ఞప్తిచేశారు. భూపాలపల్లి పోలీస్‌స్టేషన్‌లో మేడిగడ్డ బరాజ్‌ కుంగిన ఘటనపై ఫిర్యాదు చేసినప్పటికీ పట్టించుకోలేదని రాజలింగమూర్తి పేర్కొన్నారు. కేసీఆర్‌తోపాటు మాజీ మంత్రి తన్నీరు హరీశ్‌రావు, అప్పటి ఇరిగేషన్‌ కార్యదర్శి రజత్‌కుమార్‌, అప్పటి సీఎంవో స్మితాసభర్వాల్‌, చీఫ్‌ ఇంజినీర్లు శ్రీధర్‌, హరిరాం, మెఘా సంస్థ యజమాని కృష్ణారెడ్డి, ఎల్‌అండ్‌టీ జనరల్‌ మేనేజర్‌ సురేశ్‌కుమార్‌పై అభియోగాలు మోపి విచారణ చేపట్టాలని పిటిషినర్‌ కోరారు. ఈ పిటిషన్‌ను విచారణకు స్వీకరించిన కోర్టు కేసీఆర్‌తోపాటు ఎనిమిది మంది సెప్టెంబర్‌ 5న విచారణకు హాజరు కావాలని నోటీసులు పంపించింది.